Board logo

標題: 2013/02/03祖藍mark中小寶 捧做開心果 [打印本頁]

作者: calvin_1222    時間: 2013-2-3 08:51     標題: 2013/02/03祖藍mark中小寶 捧做開心果



憑無綫劇《老表,你好嘢!》彈起的肥妹小寶(陳嘉佳)人氣爆紅,她的一雙「夢想眼」令王祖藍「驚艷」,希望將她打造成香港新一代「開心果」,祖藍更大爆私底下的小寶是怕醜妹,試過扭計唔想着泳衣,雖然被爆尷尬事,小寶仍然大讚祖藍是伯樂,兩人更大講秘密,盡訴心中情!
王:王祖藍!

寶:小寶


不曾拍過拖的小寶,十分羨慕祖藍戀愛甜蜜蜜。

小寶是八級鋼琴高手。
王:印象最深刻係「福祿壽」紅館綵排開騷,你匿喺暗角望住我哋係咁大笑,對眼仲發晒光,閃爍爍o架!就係睇中你呢對「夢想眼」,一睇就知你好有表演欲,嗰次你肯跳辣身舞,仲要濕身喎!嘩,咁好玩嘅肥妹仔仲喺邊度搵!
小寶說到右手的紋身,原來有段古。

小寶、陳明恩、王菀之、王祖藍在劇中組成「Oh Baby」。
寶:我自細鍾意發明星夢,只係後來愈嚟愈肥,就冇諗落去,邊會諗到你肯用我,真係好多謝你。其實以前我都有客串電影,好似《爛賭夫鬥爛賭妻》、《天生愛情狂》,都冇人留意到我,點知一拍你做「細細粒」呢個角色就紅咗!

王:肥人點解唔可以做戲?肥人都分兩種,一種玩自己身形會覺得尷尬嘅,但你係唔介意人哋點睇、喺鏡頭前完全豁出去嗰種,呢樣嘢對做戲好緊要。

寶:你叫我做咩角色都得!同你拍劇有好大自由度,你叫我哋自己諗吓點演,演出嚟再算!

王:你真係有諗過點演嘛,同你拍嗰陣我留意到你講對白好少NG,新人嚟講呢樣嘢就睇到你有落苦功。

自備「天書」
寶:我唔想丟你架呀!我有本「天書」,堶惘陵秅漰嘅對白,我明白新人走位一定錯得多,如果連對白都背甩就真係累街坊,所以特登手抄對白,可以隨身拎住嚟睇,拍劇頭一個月冇試過因對白NG。

王:所以搵你拍咪冇錯咯,你知拍劇成日多甩漏。有一幕你、我、王菀之同陳明恩組成「Oh Baby」唱《祝福》,本嚟由你彈琴,點知部琴出咗問題,結果叫你企出嚟扮唱,演得好好,識得執生都好緊要!

寶:嗰幕雖然我冇唱《祝福》,但如果觀眾聽真啲,就會知道最後嗰段我同你有合唱。其實拍喜劇都係想大家輕輕鬆鬆笑一粒鐘,出嚟冇甩漏,大家笑得開心就得。

王:係喇,其實自從「肥姐」沈殿霞過身之後,都好耐冇出現過「開心果」,依家電視界就係少咗呢類演員,我睇好你做新一代「開心果」,可以帶嚟歡樂。

寶:又唔可以講到我咁勁,我點可以同肥姐齊名?十畫都未有半撇!不過如果公司肯畀機會我,我梗係想,氹吓香港人開心都好。

感情空白
寶:我好想澄清一件事,我從來冇講過「我係處女」呢四個字,訪問時個個人問我係咪處女,我只係應咗一聲:「嗯」,點知報道出嚟就變咗由我講,咁私人嘅事唔使同人講,自己知就算!

王:我知道報道出咗對你造成好大壓力,你之前仲打畀我訴苦,我同你做心理輔導。其實你入咗娛樂圈有冇咩唔慣?

寶:以前唔化妝就行出街,但依家會戴大眼仔同化妝,通常啲人見到我會定一定,然後問:「你係咪小寶呀?」所以係你將唔起眼嘅我變成大家嘅焦點!

王:多人識係好事,有冇男仔追你?

情傾兩韓星
寶:冇喎,以前從來都冇諗過拍拖,又冇人追,入咗行就更加冇時間諗感情事,搵到錢先算啦!我反而覺得你拍拖好sweet,雖然只見過李亞男一次,佢好甜好靚囉。

王:嗰次佢咁啱喺隔籬廠拍完《心路GPS》,順便嚟探我啫,緣分呢啲嘢要嚟自然會嚟,你有冇偏愛咩類型男仔?

寶:冇諗過,我鍾意睇韓劇,最鍾意《藍色生死戀》嘅裴勇俊同埋《秘密花園》嘅玄彬,佢兩個真係好靚仔呀!  

大食紋身
王:拍劇就拍到你勁鍾意食嘢喇,其實你係咪真係咁大食呢?

寶:我由細到大都勁鍾意食嘢!六歲嗰陣媽咪買咗十個橙,煮咗一磅雞翼,之後媽咪出咗街,四個鐘頭後佢返到屋企,嗰幾十隻雞翼、十個橙全部畀我KO晒,嚇到佢O晒嘴!
王:食量呢啲嘢你呃唔到人,但你拍劇就呃得吓人喇!鏡頭前猛講嘢,其實私底下勁怕醜,嗰次仲扭計問我:「祖藍,係咪真係要着呢套泳衣?」

寶:可能我係獨生女,加上媽咪逼我中四前要考到八級鋼琴,所以冇參加過課外活動,少接觸人,就唔多出聲。不過套泳裝真係我嘅一大突破,以我身形咁肥,平時連雞翼袖嘅衫都唔會着!

王:你買衫咪勁麻煩?

高招避教琴
寶:超難!所以媽咪造衫畀我着,我呢條頸巾係媽咪跟足韓劇《藍色生死戀》入面崔智友嗰條織o架!連呢件衫都喺佢造o架。

王:伯母真係好錫你,伯母佢超有禮貌,我諗你咁斯文都係學伯母。不過我發現你右手有個紋身,打破你斯斯文文嘅形象,哈哈哈!

寶:講起呢個紋身就勁後悔。我讀到中五就冇讀書,媽咪叫我教琴搵錢,嗰陣我都唔想教琴,就諗計仔特登去紋身,求其將塊葉嘅圖案紋上手,諗住如果家長同學生見到我手上有紋身,就唔會搵我教啦!
王:咁最後係咪唔使教琴?你呢個紋身洗咗一半又洗唔晒,一定有蹺蹊啦!
寶:又畀你估中,我媽咪招數好高,當時佢好激氣,點知佢出招逼我戴護腕遮住個紋身,繼續教琴,所以我冇嘢多,最多係護腕。其實紋完唔夠一個月我就勁想洗走個紋身,洗咗一次o架喇,不過冇時間洗晒啫。
作者: 扇子    時間: 2013-2-3 11:27     標題: 回復 1# 的帖子

多谢,可爱小宝,支持小宝。~~
作者: HONEYCHUCHU    時間: 2013-2-10 11:48

好多人都覺得,如果小寶減肥,一定是個正妹,我都覺得是,哈哈哈哈




歡迎光臨 Blessing Cho Lam 王祖藍國際官方影迷會論壇 (http://3dyinzhou.com/) Powered by Discuz! 6.0.0